У Літве эксперты прызналі казкі для выхавання талерантнасці шкоднымі для дзяцей
Эксперты Літоўскага офіса кантролю за журналістскай этыкай прыйшлі да высновы, што дзве казкі з ліку тых, што мусяць прасоўваць талерантнасць у дачыненні да аднаполых параў, шкодныя для падрастаючага пакалення.
Кнігу чарадзейных казак для дзетак «Gintarinė širdis» («Бурштынавае сэрца»), што змяшчае аповеды пра людзей з абмежаванымі магчымасцямі, аднаполыя пары, цыганоў, людзей з іншым колерам скуры ды іншыя сацыяльна ўразлівыя групы, больш немагчыма набыць, і інфармацыя пра яе была выдаленая з базы дадзеных Літоўскага педагагічнага ўніверсітэта (ЛПУ), які выдаў кнігу амаль паўгода таму.
«У адным з апавяданняў брат закахаўся ў чорнаскурага краўца, у іншым — прынцэса закахалася ў дачку шаўца. ЛПУ мяркуе, што гэта «шкодная, прымітыўная і наўмысная прапаганда гомасэксуалізму».
Пра «негатыўны змест» кнігі ў ЛПУ і Міністэрства культуры паведамілі прадстаўнікі «Форуму літоўскіх бацькоў» і група кансерватыўных членаў парламента.
Паводле экспертаў, аповеды літоўскай аўтаркі Нерынгі Дангвыдэ парушаюць Закон аб абароне непаўнагадовых ад згубнага ўплыву публічнай інфармацыі шляхам «заахвочвання канцэпту ўступлення ў шлюб і стварэння сям’і, адрознай ад зацверджанай Канстытуцыяй Рэспублікі Літва». Апроч таго, эксперты лічаць вышэй згаданыя творы «шкоднымі, навязлівымі, правакацыйнымі і маніпуляцыйнымі».
Гэта другі выпадак, калі Закон аб абароне непаўналетніх ад згубнага ўплыву публічнай інфармацыі выкарыстоўваецца для цэнзуравання публічнай інфармацыі, звязанай з ЛГБТ. У верасні 2013 тыя ж эксперты прыйшлі да высновы, што адзін з двух відэаролікаў, прапагандуючых Балтыйскі Прайд 2013 і Марш за Роўнасць, які адбыўся ў Вільні ў ліпені мінулага года, можа нанесці шкоду непаўнагадовым і мусіць транслявацца толькі ў начны час.
