Кампанія за ўсталяванне помнікаў ЛГБТ у нардычным рэгіёне
Арганізацыя ЛГБТ-працаўнікоў сферы культуры Швецыі ТУПІЛАК і міжнародная сетка культурніцкіх ініцыятываў ЛГБТК-супольнасці ILGCN падчас Сусветнага прайду 2021 у Мальмё абвясцілі кампанію за ўсталяванне ў паўночным рэгіёне Еўропы помнікаў, прысвечаных ЛГБТ.
Да ініцыятывы, сярод іншых, далучылася шведская кінарэжысёрка Джэніфер Мальмквіст.
Прэзентацыя кампаніі ўключала ў сябе паказ фільма “Манументы ЛГБТ”, знятага актывістамі ТУПІЛАК, пра помнікі, прысвечаныя ЛГБТ-супольнасці, па ўсім свеце, акрамя нардычнага рэгіёна, дзе яны пакуль адсутнічаюць. Таксама кампанія распачалася з узгадкі пра ЛГБТК-людзей, якія былі забітыя на працягу тысячагоддзяў па ўсім свеце. Рэжысёрка Джэніфер Мальмквіст прэзентавала свой кароткаметражны фільм “Удушэнне” («On Suffocation») пра двух хлопцаў геяў, якіх павесілі ў Іране за гомасэксуальныя стасункі. Гэта карціна была адзначана як найлепшая кароткаметражная стужка на кінаконкурсе Guldbagge Awards у 2014 годзе.
Лагатып арганізацыі ТУПІЛАК
Падчас сустрэчы было зазначана, што ў шведскім Гётэбургу ўпершыню ў нардычным рэгіёне плануецца ўсталяваць пастаянны манумент, прысвечаны ЛГБТ, другі пасля часовага помніка, які быў усталяваны ТУПІЛАК і міжнароднай сеткай культурніцкіх ініцыятываў ЛГБТК-супольнасці ILGCN у выглядзе піраміды з каменьчыкаў на беразе Балтыйскага мора ў Візбі.
Падчас прэзентацыі кампаніі кінарэжысёрка Джэніфер Мальмквіст атрымала адмысловы дыплом ад ТУПІЛАК – “Палярны мядзведзь” – за выбітныя дасягненні ў галіне стварэння фільмаў пра ЛГБТ.
У дадатак да распачынання кампаніі за стварэнне манументаў ЛГБТ у нардычным рэгіёне ТУПІЛАК і міжнародная сетка культурніцкіх ініцыятываў ЛГБТК-супольнасці ILGCN анансавалі правядзенне “Кінафэсту пра ЛГБТК-уцекачоў”, якія імкнуцца атрымаць абарону ў паўночных краінах Еўропы.
Кінарэжысёрка Джэніфер Мальмквіст
Арганізатары вырашылі, што першы кінафэст будзе ладзіцца ў Стакгольме падчас Шостага месяца ЛГБТК у нардычным рэгіёне ў супрацы са шведскімі, дацкімі і іншымі мясцовымі ўдзельнікамі, а наступныя кінафэсты ладзімуцься ў Мальмё, Капенгагене, эстонскім Ракверэ і іншых гарадах паўночных краінаў Еўропы. Мэта кінафэсту – заахвоціць працаўнікоў кінаіндустрыі з нардычнага рэгіёну да стварэння стужак, прысвечаных важнай і надзённай тэматыцы прымання і інтэгравання ЛГБТ-уцекачоў у паўночных краінах Еўропы.
Іншыя мерапрыемствы ТУПІЛАК і міжнароднай сеткі культурніцкіх ініцыятываў ЛГБТК-супольнасці ILGCN падчас Сусветнага прайду 2021 у Мальмё ўключалі ў сябе арганізацыю супрацы з актывістамі з Усходняй Еўропы, абмеркаванне ініцыятываў, прысвечаных гісторыі і культуры ЛГБТК, якія магчыма зладзіць падчас “Шостага месячніка гісторыі і культуры ЛГБТ у нардычным рэгіёне”.
